Hvað þýðir hálfur lífeyrir?

Ef þú vilt minnka við þig vinnu en ekki hætta alveg á vinnumarkaði, er hægt að sækja um hálfan lífeyri frá 65 ára aldri, að uppfylltum ákveðnum skilyrðum. Viðkomandi þarf að uppfylla almenn skilyrði fyrir ellilífeyri á Íslandi, hafa staðfestingu frá lífeyrissjóði um úttekt á hálfum lífeyri og staðfestingu frá vinnuveitanda um að starfshlutfall sé að hámarki 50%. Litið er til meðaltals starfshlutfalls yfir almanaksárið, þannig að í lagi er að vinna meira en 50% suma mánuði og minna aðra.